高地價政策作祟 洪雯 夾心階層亦受累

洪雯高地價政策作祟 洪雯 夾心階層亦受累過渡性房屋以公屋輪候者為入住對象。高地價政策作祟 洪雯 夾心階層亦受累洪雯指富戶遷出公屋系統,就會多咗一批人競爭居屋市場。 香港屋貴,居大不易,如何「安得廣廈千萬間」就成為社會熱烈探討嘅議題。雖然好多人都主張加建公屋,但議員洪雯就認為,即使大量興建公屋都未必係妥善解決問題之道,因為超低入息嘅門檻,將大批夾心階層排除在外!佢又指香港嘅房屋問題,同政府嘅高地價政策脫不了關係,因此除咗開拓土地,仲要諗吓公共財政方面,唔好太過依賴賣地嘅收入。洪雯喺一個網台節目中提到,目前輪候公屋要等6年,整個社會都聚焦於公屋。雖然草根階層嘅住屋需求非常迫切,然而超出入住公屋資格,但又無能力購置私樓嘅中產人士為數更廣,更需要講求安居樂業,事關夾心階層先至係社會嘅中流砥柱。洪雯指二人家庭申請公屋嘅資格,入息上限係19,550元,但時下兩個年輕人結婚,又點會得咁微薄嘅工資?佢話依家即使建過渡性房屋,但都以公屋輪候者為入住對象,到底能否騰出部分單位作青年公寓呢?洪雯話佢曾經提過呢個問題,而答案就係唔得。佢慨嘆話不管政府推出乜嘢政策,夾心階層都係無法得益嘅一群。至於居屋制度,洪雯認為雖有機會令中間階層、特別係較為年輕嘅一群受益,不過依家嘅居屋閒閒哋都講緊幾百萬。佢又提到公屋富戶政策,其實對公屋流轉作用有限,因為將富戶遷出公屋系統,就會多咗一批人競爭居屋市場,只會令到居屋嘅供應更緊張。縮小社會整體收入差距要為無殼蝸牛提供上樓嘅機會,洪雯指不但要增加土地供應,香港嘅房屋亦要將私人住宅、公屋同中間階層劃分為三個不同嘅市場,同埋要搭建一個居住環境可以向上提升嘅階梯。除此之外,要推動經濟結構轉型,創造更多上流嘅機會,提升中產以至基層嘅收入,縮小社會整體嘅收入差距。主張制度創新嘅洪雯話,香港嘅公共財政收入來源好窄,而政府每年嘅賣地收入,長期喺公共財政收入中佔約兩成,係僅次於利得稅嘅第二大收入來源。無可否認,高地價政策係造成高樓價嘅重要原因之一,而高樓價係窒礙一般市民上樓嘅最大阻力。但如何減少賣地收入,而又毋須開徵稅項呢?洪雯就指新加坡嘅政府投資基金,所帶來嘅投資收益佔政府財政收入高達兩成,幾乎等同香港嘅土地財政收入。如果香港做得成另一個政府投資基金,可以帶來好大嘅結構轉型。雖然新加坡同香港兩地嘅社會並唔相同,然而人哋嘅機制好聰明,值得香港借鑑同倣效。

香港地產新聞網 » 高地價政策作祟 洪雯 夾心階層亦受累
赞(0)

評論搶沙發

  • 昵稱 (必填)
  • 郵箱 (必填)
  • 網址