西貢土地無王管 違法亂象要徹查

打得一拳開,免得百拳來!這句話成立嘅前提係,呢一拳一定要贏,若然這一拳打出去輸咗就大鑊,極可能會引來眾人群毆!各位,功夫茶想講,早喺2020年10月,本報已踢爆西貢相思灣村土地亂象,有村霸違建道路、僭建碼頭經營水上活動店等亂象。如此明目張膽霸完陸地霸落海,經本報圖文並茂踢爆村霸惡行,惟規劃署和地政總署都係踢一踢郁一郁,尤其地政總署,連半拳都唔捨得打出,梗係百拳「來襲」啦!呢!村霸伐林建石屎路,鋪黃泥裝假狗;惟相關嘅修復工程卻由政府部門「執手尾」及公帑「埋單」。日前有地政總署嘅外判人員到場,擬裝閉路電視,相信係用作監察現場嘅情況,以作執法用途。呢單違建私路,涉事公司早前已被規劃署票控和罰款,之不過至去年8月仍未將有關地段恢復原狀,再被規劃署票控。惟審訊中因控方呈堂嘅地界索引可能存有誤差,該公司被判罪名不成立。阿哥,一拳才打出,原來係虛發,吹脹!你話西貢鄉郊土地有乜辦法唔淪為亂葬崗咁?有環團表示,類似情況喺本港多處均常出現,之但係違法者往往無乜後果,變相縱容罪案不斷發生,促請當局加強執法,並要求破壞者承擔修復責任。為政最怕善惡之不分。不分善惡,就會縱惡!惡人得不到應有嘅刑責,得戚之餘,百拳就會來!呢,自去年8月本報揭發有工程車輛闖入西貢鹹田灣嘅西貢東郊野公園範圍,疑非法建屋,後又於去年底揭露有人喺逾百年歷史嘅西貢大浪村涉嫌「拆屋」。正如有議員話齋,霸地建屋等均有前期迹象,例如傳媒多次報道有工程車輛出入,代表違法人士將有「大動作」,惟部門無視種種迹象,執法「歎慢板」,令霸地人士有機可乘。西貢土地亂象,本報一直嚴肅跟進,並多次向申訴專員公署投訴詰問,可惜地政總署、漁護署等部門依然闊佬懶理。事實上,有行山人士、西貢村民向政府部門投訴,廢衙門依然如冷凍人郁都唔郁,惟有搵勇於為民發聲,敢於運用第四權嘅東方抒發不滿、揭露真相。各位,西貢鄉郊土地亂象,已非一般涉及村屋僭建咁簡單。盲嘅都睇到,利益瓜葛盤根錯節,周邊明明被綠化地帶包圍,不管私地或官地,均不可違反土地用途,豈容誰惡誰大誰正確,有恃無恐拓路、違建丁屋、建碼頭搵真銀!西貢土地亂象如倒瀉籮蟹,更恍如唐朝安史之亂後嘅「藩鎮割據」!難怪外界質疑,當中涉及官鄉黑勾結。有道是「鬼怕惡人蛇怕棍」,阿爺都要求新班子要敢於破除利益固化藩籬。新班子成日話要說好香港故事,此時此刻,廉政公署是否應該跳出嚟查一查有冇人充當保護傘?「你貪污,害無辜」!廉署「反貪連環追擊」咁神勇,「廉潔奉公」應該唔係得個口號啩!

香港地產新聞網 » 西貢土地無王管 違法亂象要徹查
赞(0)

評論搶沙發

  • 昵稱 (必填)
  • 郵箱 (必填)
  • 網址