土地供應咪靠講 實事實幹要夠爽

香港房屋問題為禍多年,毫無疑問,係唔少港人對港府心淡,決定移民嘅原因之一;所以功夫茶一直都善意提醒新一屆政府,除咗要加強防控疫情,推動經濟復甦之外,喺民生方面,首要就係解決「住房難」呢個問題,否則難以重拾市民對港府嘅信心!呢嗱,新一屆政府上任之後,唔少官員陸陸續續通過唔同渠道,發表關於各自範疇嘅宏大目標,當中有辣有唔辣啦;財金官員當然都唔例外,尋日喺電台節目上發表「偉論」;不過就略為令人失望,佢話只有確保土地供應源源不絕,先可以解決房屋供應緊絀問題喎,鬼唔知阿媽係女人咩!對於財金官員嘅呢番「偉論」,大家係咪有種似曾相識嘅感覺呢?梗係啦!確保土地供應源源不絕喎,屆屆政府開頭都係咁講嘅;更何況雖然係新一屆政府,但仲有唔少上屆政府官員可以留任,或多或少都有啲上屆政府嘅影子嘅。唔緊要嘅,因為新一屆政府早前已經成立咗4個專責工作組,其中有一半、即係兩個工作組,係關於土地同房屋供應嘅事,分別就係「土地及房屋供應統籌組」同埋「公營房屋項目行動工作組」;查實都睇得出今屆政府有幾重視土地同房屋問題,市民自然有啲期待,多多少少都會關注呢兩個工作組嚟緊有咩計劃啦!好彩,官員都唔係單單發表「偉論」嘅,都有解釋吓呢兩個工作組究竟做啲乜!據稱,「土地及房屋供應統籌組」將會負責包括推動「北部都會區」同「明日大嶼」發展等等,大量跨部門嘅統籌工作,目標係減省各項程序、提升效率;至於「公營房屋項目行動工作組」,就會負責檢視公營房屋興建項目,確保交通基建先行,亦可加快鐵路沿線土地嘅發展等等。佢仲強調,港府未來幾年嘅收地量龐大,將會全力處理洪水橋同元朗南等嘅收地工作,簡化收地賠償,又不排除喺有需要嘅時候,重推空置稅等等;就咁聽落去,好似都幾理想㗎!之不過,講得幾好聽都冇用㗎喎,幾時做、做唔做到先係關鍵!例如話「土地及房屋供應統籌組」係負責減省各項程序咁,假如淨係研究點樣去減省程序都要用三五七年嘅話,個效益叫唔叫做大呢?又好似話港府將會全力收地咁,原來全力又要用三五七年嘅,邊會有市民願意等呢?最怕係有啲留任嘅官員沿用上屆政府嘅思維,繼續搞咩「前人種樹,後人乘涼」。大哥啊!啲「樹」都種咗25年啦,「後人」都就嚟變「前人」,幾時有得「乘涼」啊?所以話,做官同做人係一樣,除咗說話叻之外,最重要都係做嘢爽手,說一不二,話做就即刻做,極速搞掂,畀市民享福。正如特首成日講,今屆政府係「以結果為目標」,查實絕大部分市民都係,講到底唔太關心港府嘅工作流程,最重視都係成果,話之你加幾多薪、成立幾多工作組,假如公屋輪候時間一年內縮減一半,咁先叫係做得好!

香港地產新聞網 » 土地供應咪靠講 實事實幹要夠爽
赞(0)

評論搶沙發

  • 昵稱 (必填)
  • 郵箱 (必填)
  • 網址